Илебтеӈгода ненэць’

Сие ниць иры’ 20 яля — Россия’ тиӈгэвна саць ненадо яля. Тарем’ ӈод’’ хусувэй ненэця’ ехэрада. Луца вадавна «День донора» нюбе’’ӈа.

Время для чтения ~ 4 минуты

Ӈамгэ’ е’’эмня тикы ялям’ тарем’ нюмде таславэдо’? Ӈыхы 1832 похона Санкт-Петербургхана ӈарка лекар’’, Андрей Вольф, вэямда ё’’мы нем’ нядавы. Вэсаконда вэяхана савумдавэда (вэямда пухуцянда вэя’ паӈг’ сер’ ӈэдабтавэда, тарем’ не нивы яӈгув’’). Лекар’’ иӈута саву’’мэдо’. Тад нерня’ ӈока хаӈгурта ненэцям’ нядавы’’. 2007 похона яра иры’ 20 яля’ Госдума’ тасалковахана закон’ вато’’ сер’ Россия’ тиӈгэвна ненадо яляӈэ таславэдо’.

Сидяӈг: В. Езынги’ ӈэдабтавы

Нядаӈгардахана «почётной донор» нюмам’ Валерий Хатякович Езынги мэ’’ӈа. Хаӈгурта ненэцие’’ е’’эмня вэямда нида сяй’’.

— Сяха’ вэямд хаӈгурта’’ ненэцие’’ е’’эмня мипа пясар?

— Ӈокханда мале юкад вата хасава ю’’ по’’ ямбан’ вэями мипив. 2005 похона теневана няни пухуця лекар’’ мякана мэсь. Не нюкцямда сояванда мальӈгана ӈока вэям’ ё’’ӈась. Е’’эмнанда лекар’’ мят’ хаядамзь. Манэ’’махадандо’ вэями саваӈэ таславэдо’. Таминдо’ хаӈгурта не’ вэяӈэ ханадо’. Тикы’ пуд си’’ми хонра’’, ма’’ним’’: «Етри’ вэямд тамбавы ӈэбат сава ӈэӈгусь. Тарця’’ нядаӈгода’’ ёльце тара’’». Тарем’ «донорӈэ» хаядм’. Тамальӈгана соявы не ӈацекэця теда’ мале 19 пода. Нядаӈгардахана колледжхана тохолкурӈа. Тадри’ садикхана манзаранаӈэ тараӈгу.

— По’ ямбан’ сян мэва’ тарем’ нядаӈгурӈан?

— Сидя ирыхына ӈопой мэва’ лекар’’ мят’ вэями миманзь хэсетыдм’. Ханяӈэхэна лакри’ тараванда мальӈгана си’’ми харто’ ханзеты’’, лаханасеты’’. Ӈобаӈгуна ты пэрти’’ яля’ пуд ӈопой мядонда лекар’’ мят’ еремы. Ӈэдалёванда сер’ хан’ ӈылна хаёвы, пыхыдамда маядавы. Ӈока вэямда ё’’мы. Пыда е’’эмнанда вэями миӈадамзь.

— Тарана сер’’ е’’эмня есям’ салдамбасеты’’?

— Мань си’’ни то’’олха’’ нядаӈгода’’ есям’ ня’’амсеты’’. Теда’ вэям’ ӈопой мэва мип’’, 1553 рубльм’ салдаӈгу’’. Лекар’’ мят’ хэванд мальӈгана манзаяхаданд тикы яля’ ӈэвадё пиртан. Мякананд ныланаӈгун. Мань тамна «Почётной донор» ненадумда’’мами таня. Тарця падарм’ ня’’амвы’’ ненэця’’ ӈока хаӈгуртам’ нядавы’’. Закон’ ватовна тет юкад вата яӈорэй вэямда ми’’мы ненэцяли ненадо нюмдамда ня’’маӈгу.

— Сит тотрев’ ӈани’ вэямдо’ мипван харвана’’ ӈамгэм’ теневабто’ тара?

— Сяхари’ хибяхав сава иӈут’ ха’’амбата, нерде’ лекар’’ мят’ ханда. Таняна таслаӈгудо’: вэяда сава ӈэдакы, вэва ӈэдакы, сенз ӈэвамда ӈани’ манэта’’. Тикарихина вэямда мипа пирта.

— Тарця серкана мэвар ихинанд хурка?

— Тарем’ нядаӈговами ӈули’’ саву’’ӈав. Хаӈгурта ненэця’ харта вэядамда таванда ненэцяндамда пюрманзь вуни ядэрт’’. Ӈадьбята ӈани’ нядаӈгован’ харвабата’’, пуня’ нёда’’ ӈа’’. Вэямдо’ мипада’’ — ненэцие илебтембада’’ то’’олха’’.

Таӈок по’ ямбан’ сян вэям’ мимакы, сян ненэцям’ нядавакы, тюку яля’ Валерий Хатякович’ е’’эмня сава вади мэ’’ӈава’’. Сензан ӈа’’, мят тер’’ хэвхананд мэя’’, ӈэвакуто’ ни’ ёмзяли’ тэсая.

Автор: Г. Окотэтто’ падвы

Авторы

Няръяна Нгэрм

05:57, 20 апреля 2024

Темы